გამოჯანმრთელება დღიდან დღემდე

ოპერაციის დღე

ოპერაციიდან რამდენიმე საათში, როგორც კი ანესთეზიის მოქმედება გაივლის და მდგომარეობა სტაბილურია, პაციენტი ფიზიოთერაპევტთან ერთად დგება ფეხზე.

• რას აკეთებთ

  ჯდებით საწოლის კიდეზე, შემდეგ დგებით დამხმარე ჩარჩოს დახმარებით და დგამთ პირველ ნაბიჯებს პალატაში.

• რას გრძნობთ

  ჭრილობის არეში ტკივილი, სისუსტე და ხშირად ფეხის მძიმედ შეგრძნება. ტკივილი იმართება მედიკამენტებით. ბევრი პაციენტი აღნიშნავს, რომ სახსრის „ძველი“, ღრმა ტკივილი უკვე აღარ არის.

• რა არის მნიშვნელოვანი

  ღრმა სუნთქვა, ტერფის მოძრაობა და სითხის მიღება. ეს სამი მარტივი რამ ამცირებს პნევმონიის და თრომბოზის რისკს.

პირველი და მეორე დღე, გაწერა

• სიარული

  დისტანცია ეტაპობრივად იზრდება. პალატიდან გადიხართ დერეფანში. ფიზიოთერაპევტი გასწავლით კიბეზე ასვლას და ჩამოსვლას.

• ტკივილის მართვა

  ინექციური პრეპარატებიდან გადადიხართ აბებზე. მიზანია, ტკივილი იმ დონეზე იყოს, რომ სიარულს არ უშლიდეს ხელს.

• გაწერის კრიტერიუმები

  დამოუკიდებლად დგებით და დადიხართ დამხმარე ჩარჩოთი, ადიხართ კიბეზე, ტკივილი იმართება აბებით და ჭრილობა მშვიდადაა. ჩვეულებრივ ეს პირობები მეორე დღისთვის სრულდება.

• რას მიიღებთ გაწერისას

  წერილობით ინსტრუქციას, მედიკამენტების სქემას, სავარჯიშოების ნუსხას, საკონტროლო ვიზიტის თარიღს და ჩემს ნომერს კითხვებისთვის.

პირველი ორი კვირა სახლში

ეს არის პერიოდი, როცა ყველაზე მეტი კითხვა ჩნდება. ძირითადი წესი მარტივია: დადით რეგულარულად და მოკლე მონაკვეთებით, დაისვენეთ ხშირად, არ დაჯდეთ დიდხანს უმოძრაოდ.

• რა შეიძლება

  სიარული ბინაში და ეზოში, კიბე, ჯდომა და ადგომა, მსუბუქი საოჯახო საქმე, სავარჯიშოების შესრულება დღეში რამდენჯერმე.

• რა არ შეიძლება

  მძიმის აწევა, ხანგრძლივი დგომა ერთ ადგილას, დაბალ და რბილ სავარძელში ჯდომა, აბაზანაში ჩაწოლა. ავტომობილის მართვა ამ ეტაპზე ჯერ არა.

• ჭრილობის მოვლა

  ჭრილობა მშრალი და სუფთა უნდა იყოს. ძირითად შემთხვევებში ყოველდღიური შეხვევა საჭირო არ არის. ბანაობის დროზე კონკრეტულ ინსტრუქციას გაწერისას მიიღებთ.

• შეშუპება

  ფეხის და ტერფის შეშუპება პირველ კვირებში ჩვეულებრივია. ეხმარება ფეხის აწევა დასვენებისას და კომპრესიული წინდები. თუ შეშუპება უეცრად ძლიერდება ან ცალმხრივია და მტკივნეული, დარეკეთ.

დამხმარე ჩარჩო მინიმუმ ორ კვირას გჭირდებათ, ზოგს სამი კვირა სჭირდება. ორ კვირაზე კლინიკაში მოდიხართ: ნაკერები იხსნება და კეთდება საკონტროლო რენტგენი და ლაბორატორიული კვლევები. ამის შემდეგ, როგორც წესი, ხელჯოხით იწყებთ სიარულს. ეს ჩვეულებრივი მიმდინარეობაა და არა ვადა, რომელსაც უნდა მიჰყვეთ. ზოგს უფრო მეტი დრო სჭირდება და ეს ნორმალურია.

ექვსი კვირა: დაბრუნება ჩვეულ ცხოვრებაში

ყველა ვადა ინდივიდუალურია და საკონტროლო ვიზიტზე ზუსტდება. არცერთი მათგანი არ არის დაპირება.

სამი თვე და შემდეგ

რომელ ნიშნებზე უნდა დარეკოთ დაუყოვნებლივ

გამოჯანმრთელების პერიოდში დისკომფორტი ნორმალურია. მაგრამ არსებობს ნიშნები, რომლებზეც ლოდინი არ ღირს. ასეთ დროს დარეკეთ ან მიმართეთ გადაუდებელ სამსახურს.

• სიცხე 38 გრადუსზე მაღლა, განსაკუთრებით შემცივნებასთან ერთად.

• ჭრილობიდან გამონადენი, სიწითლე, სითბო ან უსიამოვნო სუნი.

• ტკივილის უეცარი და ძლიერი მატება, რომელიც მედიკამენტს არ ემორჩილება.

• წვივის ცალმხრივი, მტკივნეული შეშუპება ან სიწითლე. ეს შეიძლება იყოს თრომბოზის ნიშანი.

• ქოშინი, გულმკერდის ტკივილი ან უეცარი სისუსტე.

• ფეხის ვერ დაბჯენა, ფეხის სიგრძის უეცარი შეგრძნებადი ცვლილება, სახსრიდან ხმა ტკივილთან ერთად.

• ვარდნა ან ტრავმა, თუნდაც ტკივილი ძლიერი არ იყოს.

ჩემი ნომერი გაწერისას გეძლევათ. კითხვის დასმა ყოველთვის უკეთესია, ვიდრე ლოდინი. არასდროს არ იფიქროთ, რომ „უადგილო“ დროს რეკავთ.

კითხვები და პასუხები